پریس ریلیزز

اسلام آباد (15 ستمبر 2021): لائسنس پرپی ٹی ایم ایل (یوفون) کے دستخط کے سلسلے کی تقریب آج یہاں پی ٹی اے ہیڈ کوارٹرز اسلام آباد میں منعقد ہوئی۔ پاکستان میں نیکسٹ جنریشن موبائل سروسز (این جی ایم ایس)2021 کا لائسنس یوفون کو جاری کیا گیا جس میں صارفین کے مفاد ات کے تحفظ کو یقینی بنانے کے لیے بہتر نیٹ ورک رول آؤٹ اور کوالٹی آف سروس کے معیارات شامل ہیں۔

تقریب میں وفاقی وزیر برائے انفارمیشن ٹیکنالوجی اور ٹیلی کمیونیکیشن سید امین الحق ، وفاقی سیکرٹری برائے آئی ٹی اینڈ ٹیلی کمیونیکیشن، چےئر مین پی ٹی اے، اتھارٹی کے ممبران، ایگزیکٹو ڈائریکٹر، فریکوئنسی ایلوکیشن بورڈ اور پی ٹی ایم ایل (یوفون) کی سینئر مینجمنٹ نے شرکت کی۔ 

اس موقع پر وفاقی وزیر آئی ٹی اینڈ ٹی سید امین الحق نے کہا کہ وزارت آئی ٹی ملک میں روابط کی توسیع اور ڈیجیٹل انفراسٹرکچر کو بہتر بنانے کے لیے پرعزم ہے۔اس کے علاوہ حکومت” ڈیجیٹل پاکستان وژن“کے حوالے سے بھی بھرپور اقدامات کر رہی ہے۔ انہوں نے یوفون کو این جی ایم ایس لائسنس حاصل کرنے پر مبارکبادپیش کی۔ 

اس موقع پر چیئرمین پی ٹی اے نے کہا کہ اعلیٰ و معیاری خدمات تک رسائی اور ہر جگہ کوریج کی توسیع کو یقینی بنانے کے لئے پی ٹی اے اقدامات کر رہا ہے ۔ انہوں نے سپیکٹرم کی نیلامی کی بروقت تکمیل کے حوالے سے پی ٹی اے، ایف اے بی اور ایم او آئی ٹی کے متعلقہ حکام کی انتھک کا وشوں کی بھی تعریف کی ۔

تقریب سے خطاب کرتے ہوئے سی ای او پی ٹی ایم ایل (یوفون) نے کہا کہ اضافی سپیکٹرم سے آپریٹر کو اپنے صارفین کے لئے طویل المدتی فوائد اور ر وابط کی فراہمی میں مدد ملے گی۔

 

 

خرم مہران 

ڈائریکٹر تعلقات عامہ